Cənubi Qafqaz qarşıdurma və düşmənçilik bölgəsi olub.
Azərbaycan Respublikasının Prezidenti cənab İlham Əliyevin “Euronews” televiziyasına verdiyi müsahibə ölkəmizin daxili və xarici siyasətinin əsas istiqamətlərini, regional və qlobal dəyişikliklərə uyğun strategiyasını aydın şəkildə nümayiş etdirdi.
Ölkə rəhbərinin “Euronews” televiziyasına müsahibəsi bir daha göstərdi ki, Azərbaycan dövlət başçısının rəhbərliyi ilə uğurlu daxili və xarici siyasət həyata keçirir.
Dövlət başçısının vurğuladığı məsələlər, Azərbaycanın beynəlxalq münasibətlərdə müstəqil və qətiyyətli mövqeyini, milli maraqlarını qorumaq üçün həyata keçirdiyi düşünülmüş siyasəti bir daha təsdiqləyir.
Cənubi Qafqazda barış və əməkdaşlıq mühitinin hökm sürməsi, regionun dünyanın geosiyasi, geoiqtisadi müstəvisində daha böyük rol oynaması Azərbaycanın xarici siyasətində yer alan mühüm məqamlardan biridir. Mövcud tarixi şəraitdə regionun inkişafının məhz bu müstəvidə qurulması baxımından əlverişli imkanların formalaşması da aydın müşahidə olunur. Xüsusən də Azərbaycanın İkinci Qarabağ müharibəsindən sonra regionda yaratdığı yeni reallıqlar bütün Cənubi Qafqaz ölkələri qarşısında çoxsaylı imkanlar pəncərəsi açıb. İndi başlıca məqam bu imkanlardan məharətlə faydalanıb, regionda sülh və əməkdaşlıq səhifəsinin açılmasına nail olmaqdır. Proseslərin məhz bu səpkidə inkişafı istiqamətində Azərbaycan müvafiq fəaliyyət həyata keçirir, ölkəmizin sözügedən istiqamətdə siyasəti qonşu Gürcüstan tərəfindən fəal şəkildə dəstəklənir. Lakin istənilən nəticəyə nail olunması üçün Ermənistanın da adekvat addımlar atması zəruri şərtdir.
Hazırda görünən odur ki, Ermənistan Cənubi Qafqazın intibahına çalışmaqdansa daha çox buna əngəl yaratmaqla məşğuldur. Halbuki, bundan ən çox zərər görən tərəf də özüdür. Xüsusən də o fonda ki, yanlış xarici siyasəti səbəbindən Ermənistan böyük geosiyasi qüvvələr arasında mübarizənin növbəti poliqonu ola bilər. Bundan xilas olmağın yeganə yolu isə regionun lider ölkəsi olan Azərbaycanla əməkdaşlıq münasibətləri qurmaq, sülh şəraitində yaşamaqdır. Bu hal həm də Ermənistana Türkiyə ilə əlaqələrində yeni bir səhifənin açılmasına imkan verəcək.
Zərdab rayon Hüseynxanlı kənd ümumi orta ümumtəhsil məktəbinin direktor əvəzi-Rəşanə Bayramova
Milli maraqlarımız məsələsində heç kəsə və ya heç bir təsisata arxalanmamışıq.
XII Qlobal Bakı Forumu sadəcə beynəlxalq sammitlər və konfranslar silsiləsində növbəti tədbir olmadı, o, ideyaların, strategiyaların və gələcəyə dair baxışların kəsişdiyi əsl intellektual mərkəzə çevrildi. Bu forum qlobal çağırışların qasırğasında mayak kimi parladı və Azərbaycanın Şərqlə Qərb, Şimalla Cənub arasında dialoq platforması və körpü rolunu bir daha nümayiş etdirdi. Martın 14-də Azərbaycan Respublikasının Prezidenti cənab İlham Əliyevin forum çərçivəsində çıxışı və “Euronews” telekanalına verdiyi müsahibə bu mötəbər tədbirin parlaq məqamlarından biri oldu.
Həm qərb, həm də digər qonşu dövlətlərə yönəlik bu mesajlarda daha çox diqqət çəkən məqam hazırkı dünya düzəni və gələcəklə bağlı narahatlıqların ifadə edilməsi idi. Həm haqlı, həm güclü tərəf olması üstünlüyünü açıq şəkildə ortaya qoyan prezident İlham Əliyev müsahibə boyunca hər kəsi maraqlandıran, hətta dost olmayanların belə reaksiya gözlədiyi məsələlər üzrə açıq və beynəlxalq hüquqa əsaslanan mövqe nümayiş etdirmiş oldu.
Prezident qeyd etdi ki, beynəlxalq hüquq artıq işlənməz hala gəlib və bu şəraitdə ölkələr daha çox öz daxili resurslarına arxalanmalıdır. Artıq dünya nizamsızlığa doğru yol alıb. Beynəlxalq ictimaiyyətin istifadə edəcəyi qarşılıqlı əlaqə konfiqurasiyası bəlli deyil. Yaxşı olar ki, hər bir ölkə özünün daxili işlərinə və daxili imkanlarına daha çox diqqət ayırsın.
Çağdaş geopolitik durumdan irəli gələn nəticənin bizim praktikamızda konkret örnəyi olduğunu qeyd edən ölkə başçısı Azərbaycanın bu yanaşma ilə dünyada böyük nüfuz qazandığını vurğulayaraq beynəlxalq təşkilatların get-gedə zəiflədiyini və ikitərəfli münasibətlərin ön plana çıxdığına da diqqət çəkdi. Azərbaycan prezidentinin yaxın illərdə dünyada sabitliyin bərqərar olacağına nikbin baxmadığını açıq ifadə etməsi onun bir daha populizmdən uzaq bir siyasətçi olduğunu göstərdi ki, bu da müasir dünyada bir çoxları üçün örnək ola bilər. Bu, milli maraqlara arxalanan liderin gələcəyə əminliyinin parlaq ifadəsi idi. Məhz milli iradəyə və xalq gücünə söykən lider olaraq İlhham Əliyev bu müsahibəsində dünyanın gələcəyi ilə bağlı ciddi mesajlar verməklə yanaşı, həm də qlobal diplomatik müstəvidə çoxlarına dərs keçmiş oldu. Prezidentin müsahibə boyu fikirlərində yenə də əsas ana xətt o idi ki, Azərbaycan cəmiyyətinin düşünən kəsimi, siyasi elitamız dövlətin və xalqın maraqlarının müdafiəsində gərək yekdil olsunlar, həmahəng fəaliyyət göstərsinlər. Azərbaycan ərazi bütövlüyünü, suverenliyini ona görə tam bərpa etməyib ki, kimlərsə yuxarıdan boylanıb bizə yol göstərsinlər, eləcə də aldadaraq yanlış istiqamətə sövq etsinlər.
Zərdab rayon Şıxbağı kənd tam orta ümumtəhsil məktəbinin direktoru-Sabir Əhmədov
