Sabiq əmək və əhalinin sosial müdafiəsi naziri Səlim Müslümovun məhkəmə prosesi 1 aylıq təxirə salınıb.
“Qanunla.az” xəbər verir ki, Bakı Ağır Cinayətlər Məhkəməsində keçirikən prosesin təxirə salınması səbəblərindən biri zərərçəkmiş qismində tanınmış Maliyyə Nazirliyinin nümayəndəsinin iştirak etməməsi, digəri müdafiə tərəfinin vəsatəti olub.
Hakim Faiq Qəniyev deyib ki, zərərçəkmiş qurumun nümayəndəsinə növbəti iclasda iştirakının vacib olması ilə bağlı yazılı bildiriş göndərilməlidir.
Səlim Müslümovun vəkilləri Ayxan Hüseynzadə və Toğrul Vəliyev isə protokollarla tanış olmaq üçün vaxt verilməsini istəyiblər.
Məhkəmə həm zərərçəkmiş qurumun hüquqi varisinin iştirak etməməsini, həm müdafiəçilərin vəsatətini nəzərə alaraq prosesin təxirə salınmasına qərar verib.
Məhkəmə tərkibinə daxil olan hakimlərdən birinin məzuniyyətə çıxması səbəbindən növbəti iclas oktyabrın 4-də keçiriləcək.
