Mərkəzi Aran Regional Təhsil İdarəsinin təşkilatçılığı ilə xalqımızın qədim tarixi və milli-mənəvi dəyərlərini özündə yaşadan Novruz bayramına həsr olunmuş möhtəşəm tədbir keçirilib.
Qanunla.Az xəbər verir ki, bayram şənliyində Mərkəzi Aran Regional Təhsil İdarəsinin müdiri vəzifəsini icra edən müdir müavini Cavad Cavadov, idarənin struktur üzrə bölmə rəhbərləri, tabeliyində olan təhsil sektorlarının müdirləri və əməkdaşları iştirak ediblər.
Tədbir Azərbaycan Respublikasının Dövlət Himninin səsləndirilməsi və şəhidlərimizin əziz xatirəsinin anılması ilə başlayıb. Tədbirin açılışında çıxış edən Cavad Cavadov Novruz bayramının milli-mədəni sərvətlərimiz sırasında xüsusi yer tutduğunu vurğulayıb. O, iştirakçıları bu əziz bayram münasibətilə təbrik edərək, onlara möhkəm can sağlığı, xoş əhval-ruhiyyə və bol ruzi-bərəkət arzulayıb.
Şənlik zamanı müxtəlif musiqi nömrələri səsləndirilib, milli oyunlar və əyləncəli yarışlar təşkil edilib, bayram coşğusu iştirakçılara unudulmaz anlar yaşadıb.
