image-970_50
image-255815221_318544809705065_3105600474839531820_n

“Oğlumun sonsuza qədər kor qala biləcəyini təsəvvür etməkdən belə qorxuram” – YARDIM ÇAĞIRIŞI + FOTO

image-suni_mayalanma_qiymeti

 

Masazır qəsəbə sakini Samirə Kərimova Media.Az-ın redaksiyasına kömək üçün müraciət edib. O, nadir genetik göz xəstəliyi ilə doğulan və kor qalmaq üzrə olan oğlu üçün yardım istəyir.

Üç yaşlı Ömər Kərimov görmə qabiliyyətinin getdikcə pisləşməsi ilə müşayiət olunan və tam korluqla nəticələnə bilən irsi göz xəstəliyi – tor qişanın abiotrofiyasından əziyyət çəkir. Ufalı həkimlər körpənin görmə qabiliyyətini bərpa etməyə kömək üçün çalışmağa razılaşıblar. Uşağa müalicə kursu təyin olunub, artıq iki uğurlu əməliyyat keçirilib, daha üç əməliyyat qalıb. Ancaq Ömərin valideynlərinin pulu qurtarıb.

Uşağın anasının redaksiyaya verdiyi məlumata görə, Ömərin vəziyyəti hər gün pisləşir, hazırda gözləri cəmi 2 % görür.

Qeyd edək ki, qadının hər iki oğlu – Ömər və böyük qardaşı dörd yaşlı Qalib görmə qüsuru ilə dünyaya gəlib. Ananın sözlərinə görə, göz xəstəlikləri ata tərəfdən uşaqlara genetik olaraq keçib.

“Qalibə “qlaukoma” – görmənin geridönməz şəkildə aşağı düşməsinə və itməsinə səbəb olan göz xəstəliyi diaqnozu qoyulub. Doğulandan sonra uşaq görürdü, amma sonra sürətlə görmə qabiliyyətini itirməyə başladı. Akademik Zərifə Əliyeva adına Milli Oftalmologiya Mərkəzində aparılan iki əməliyyat sayəsində proses dayandırılıb. Hazırda böyük oğlumun gözü cəmi 25 % görür. Əməliyyatlar bizə kreditlə götürdüyümüz 4 000 manata başa gəlib. Qalib residiv anını qaçırmamaq üçün hər altı aydan bir anesteziya altında gözlərinin təkrar müayinəsindən keçməlidir (Hər birinin qiyməti 250 manatdır). Bu səbəbdən kiçik oğlumuzun müalicəsini davam etdirmək üçün maddi imkanımız yoxdur, baxmayaraq ki, o artıq demək olar ki, görmür”.

S.Kərimova kiçik oğlunun bütün günü qucağında olduğunu deyir.

“Onu bir az özü yerisin deyə yerə qoyanda dərhal yıxılır. Belə halda hətta başını əzə də bilər. Özünə o qədər zərərə verib ki…! Ötən gün istilik sobasını yandırmamış, o, üzünü ona yapışdırdı. Davamlı olaraq “ana, bu nədir, bu kimdir” deyə ağladığı üçün heç yerə getmirik”, – deyə Kərimova əlavə edib.

Ananın sözlərinə görə, onlara Ufada bu xəstəliyin müalicə edildiyi xəstəxana məsləhət görülüb.

“Hətta elə bir ailə tanıyırıq ki, övladım Ömərlə eyni diaqnozla 10 il əvvəl orada əməliyyat olunub, indi isə artıq məktəbə gedir. Bütün bunlar bizə də ümid verdi. Təyin olunmuş beş əməliyyatdan ikisini artıq həyata keçirmişik. Amma müalicə kursunu davam etdirməyə pulumuz yoxdur. Uçuş biletləri ilə birlikdə bir əməliyyat 7 000 manata başa gəlir. Sosial şəbəkələrdə yardım çağırışları paylaşdıq, ictimai xadimlərə canlı yayım üçün müraciət etdik. Bunun sayəsində ümumi məbləği sözün həqiqi mənasında manat-manat toplayaraq iki əməliyyatı edə bildik. Qarşıda daha üçü var, amma bundan sonra hara müraciət edəcəyimizi bilmirik”, – deyə Kərimova bildirib.

O, Zərdab rayonunun Sarı Qaya kəndindən olduqlarını, amma həkimlərə yaxın olmaq üçün hazırda Masazırda kirayədə yaşadıqlarını qeyd edib.

“Hər şey oğullarımızın sağlamlığı üçündür! Həyat yoldaşımın 56 yaşlı qardaşı da bizimlə yaşayır. Onun ruhi xəstə olması, valideynlərinin isə həyatda olmaması səbəbindən ona qulluq etməyi özümüzə borc bilirik. Ərim sıravi işçidir. Uşaqların səhhətində problemlər olmasaydı, onun maaşı bizə bəs edərdi. Mən heç vaxt heç kimdən heç nə istəməmişəm, sadəcə oğullarımın müalicəsi lazımdır. Oğullarımın kor qala biləcəyini təsəvvür etməkdən belə qorxuram. Onlar kor halda necə yaşayarlar? Uşaqlarımın aciz, asılı qalmalarını istəmirəm. Hər gün uca Allaha dua edirəm ki, Ömərin görmə qabiliyyətini qaytarsın ki, qalan əməliyyatları həyata keçirə bilək, yarı yolda təslim olmayaq”, – deyə Samirə Kərimova bildirir.

Biganə olmayan hər kəsi Kərimovlar ailəsinin probleminə həmdərd olmağa və balaca Ömərə bacardıqca kömək etməyə çağırırıq.

Samirə xanımla əlaqə nömrəsi: (+994 50) 313 48 18

 

image-rek-qanunla-az

  • whatsapp
  • messenger
  • telegram
  • vkontakte
  • odnoklassniki