Qubadlı rayonu Azərbaycan Respublikasının cənub-qərbində, Qarabağ yaylasının şərqində yerləşir.
Qubadlı dedikdə ilk növbədə akademik Möhbalı Əmiraslanov, general Valeh Bərşadlı, xalq yazıçısı Süleyman Rəhimov, Əli Vəliyev xalq qəhrəmanı Qaçaq Nəbi, Həcər xanım, dövlət xadimlərindən Çingiz İldırım, Əli İbrahimov, Nəzər Heydərov, Zəhra Kərimova, Qara İlyasov, Azərbaycanın Milli Qəhrəmanlarından Əliyar Əliyev, Bəylər Ağayev, Aslan Atakişiyev, Səfa Axundov, Ələkbər Əliyev, Kazımağa Kərimov, Aqil Məmmədov, Kərəm Mirzəyev, Vasili Əliyev, Fəxrəddin Cəbrayılov yada düşür. Qəhrəmanlar, igidlər məskəni olan Qubadlı rayonu özünəməxsus coğrafi mövqeyi, könülləri oxşayan təbiəti ilə hər zaman diqqət mərkəzində olmuşdur. Rayonun ümumi sahəsi 802 kvadrat kilometrdir. Səthi əsasən dağlıqdır. Qubadlı rayonu qərbdən 120 km məsafədə Ermənistan Respublikası ilə, Şimaldan Laçın rayonu, Xocavənd rayonu, Şərqdən Cəbrayıl rayonu, Cənubdan isə Zəngilan rayonu ilə həmsərhəddir. Qubadlı rayonunun kəndləri əsasən Həkəri və Bərgüşad çayları ətrafında yerləşir. Azərbaycanın dilbər güşələrindən olan Qubadlı rayonu eyni zamanda məhsuldar, münbit torpaqları ilə fərlənir. Rayonda əsasən qəhvəyi dağ-meşə torpaqları yayımışdır. “Yazı düzü”, “Gəyən”, “Mərzə” adlanan düzləri bol məhsuldar torpaqlardan ibarətdir. İşğala qədər bu torpaqlarda taxıl, üzüm, tütün, bostan məhsulları becərilirdi. Uzun illər düşmən tapdağında qalan tarixi yurdumuz Qubadlı rayonu Ali Baş Komandan İlham Əliyevin rəhbərliyi ilə başlayan Vətən Müharibəsində müzəffər ordumuzun gücü ilə öz azadlığına qovuşdu. Müzəffər ordumuz ilə döyüşlərdə rüsvayçı bir şəkildə məğlub olan Ermənistan ordusu 2020-ci il 25 oktyabr tarixində Qubadlı rayonundan da çəkilməli oldu və rayonun mərkəzində üç rəngli, şanlı bayrağımız ucaldı.
Bu gün Qubadlıda yüksək quruculuq, bərpa işləri, kəndlərin salınması, yeni yaşayış məskənlərinin inşası fasiləsiz olaraq davam edir. Cənab prezident İlham Əliyevin tapşırığı ilə Qarabağ və Şərqi Zəngəzur iqtisadi rayonlarının sosial-iqtisadi inkişafında mühüm rol oynayacaq Qubadlı-Eyvazlı avtomobil yolunun tikintisi aparılır.
Əlvənd kənd H. Zərdabi adına tam orta məktəbin direktoru E. Xəlilov
Qubadlıda işğala qədər taxıl, üzüm, tütün, bostan məhsulları becərilir, heyvandarlıqla məşğul olunurdu.
Qubadlı rayonu, işğaldan əvvəl zəngin kənd təsərrüfatı ənənələri və təbii sərvətləri ilə tanınan bir bölgə idi. Rayonun iqtisadi və sosial həyatının əsasını əkinçilik və heyvandarlıq təşkil edirdi. Bu torpaqlarda illərlə taxıl, üzüm, tütün və bostan məhsulları becərilir, heyvandarlıq inkişaf etdirilirdi. Rayonun əkinçilik potensialı, xüsusilə tütünçülük sahəsində, iqtisadiyyatın mühüm dayaqlarından biri hesab edilirdi. Tütünçülük Qubadlının iqtisadi fəaliyyətində əhəmiyyətli rol oynayırdı və kənd təsərrüfatı sektorunda geniş məşğulluq imkanları təmin edirdi. Bölgənin iqlimi və torpaq şəraiti tütün bitkisinin yüksək keyfiyyətlə yetişdirilməsinə imkan verirdi ki, bu da həm daxili tələbatı ödəyir, həm də ölkə xaricinə ixrac edilə bilən məhsul yetişdirilməsinə şərait yaradırdı. Əkin sahələrinin böyük hissəsi “Gəyən” və “Yazı” düzənliklərində yerləşirdi. Bu düzənliklər məhsuldar torpaq təbəqəsinə malik idi, bu da əkinçiliyin inkişafına şərait yaradırdı. Dağ ətəyi meşə zonası isə həm təbii sərvətləri, həm də coğrafi mövqeyi ilə heyvandarlığın inkişafına töhfə verirdi. Bundan əlavə, Bərgüşad və Həkəri çaylarının vadiləri əkinçilik üçün əlverişli şərait yaradan su mənbələri idi. Qubadlıda kənd təsərrüfatının inkişafı təkcə iqtisadi deyil, həm də sosial təsirə malik idi. Yetişdirilən məhsullar yerli əhali üçün əsas ərzaq təminatını təşkil edir, həmçinin ölkənin digər regionlarına da göndərilirdi. Tütünçülük, üzümçülük və taxılçılıq sahələri isə bölgənin əsas gəlir mənbələri olaraq çıxış edirdi. Bu gün işğaldan azad olunan Qubadlı torpaqlarında kənd təsərrüfatının yenidən bərpası böyük əhəmiyyət daşıyır. Əkin sahələrinin və təsərrüfat işlərinin yenidən canlandırılması bölgənin iqtisadi inkişafına və kənd təsərrüfatı sektorunda məşğulluq səviyyəsinin artmasına səbəb olacaq. Tütünçülük, üzümçülük və digər kənd təsərrüfatı fəaliyyətlərinin yenidən inkişaf etdirilməsi ilə Qubadlı rayonu öz tarixi təsərrüfat rolunu geri qaytarmağa hazırdır.
Gəncliyə Dəstək İctimai Birliyinin sədri –Vəfa Xəlilli
