Zərdab Rayon Heydər Əliyev Mərkəzinin təşkilatçılığı ilə Naxçıvan Dövlət Xalça Muzeyi ilə birgə “Milli sərvətimiz olan xalçaçılıq sənəti” mövzusunda onlayn tədbir keçirilmişdir.
Onlayn tədbiri Zərdab rayon Heydər Əliyev Mərkəzinin direktoru Könül Rəhimova açaraq Azərbaycanda xalçaçılığın inkişaf yollarından, xalça örnəklərimizin dünya muzeylərində və şəxsi kolleksiyalarda qorunub saxlanmasından danışdı.
Qeyd etdi ki, qədim tarixə malik Azərbaycan xalçaçılıq sənəti beynəlxalq miqyasda tanınır. Bu gün bu sənətin inkişafı dövlət qayğısı ilə tam əhatə olunub. Bütün bunların nəticəsidir ki, Azərbaycan xalça sənəti UNESCO-nun Qeyri-maddi mədəni irs siyahısına salınaraq dünya mirasına çevrilib.
Könül xanım xalçaçılıq sənətinin inkişafında əməyi olanları əlamətdar gün münasibətilə təbrik etdi.
Naxçıvan Dövlət Xalça Muzeyinin direktoru Ulviyyə Məmmədova çıxış edərək muzeyin yaranması tarixindən danışmışdır.
Qeyd olunmuşdur ki, muzey Naxçıvan Muxtar Respublikası Ali Məclisi Sədrinin tapşırığına əsasən Naxçıvan Muxtar Respublika Nazirlər Kabinetinin 15 yanvar 1998-ci il tarixli qərarı ilə yaradılmışdır. 1998-ci il 26 yanvar tarixində 387 eksponatla fəaliyyətə başlayan muzeydə hazırda 4000-ə yaxın eksponat mühafizə olunur ki, bunun da əsas hissəsini Naxçıvan qrupu xalçaları təşkil edir. Çıxışda həmçinin Naxçıvan qrupu xalçalarının yaranma tarixindən, bədii tərtibatından, özünə məxsus xarakter və keyfiyyətindən bəhs olunmuşdur.
Diqqətə çatdırılmışdır ki, 2010-cu ildə xalça sənəti YUNESKO-nun Bəşəriyyətin qeyri-maddi mədəni irs üzrə reprezentativ siyahısına daxil edilmişdir. Azərbaycan Respublikasının Prezidenti cənab İlham Əliyevin “Azərbaycan Respublikasında “Xalçaçı günü” peşə bayramının təsis edilməsi haqqında” 2016-cı il 25 noyabr tarixli Sərəncamına əsasən, hər il mayın 5-i ölkəmizdə “Xalçaçı günü” peşə bayramı kimi qeyd edilir.
Vurğulanmışdır ki, Azərbaycan Respublikası Prezidentinin 28 fevral 2018-ci il tarixli Sərəncamı ilə “Azərbaycan Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı”, Naxçıvan Muxtar Respublikası Ali Məclisi Sədrinin 2018-ci il 9 aprel tarixli Sərəncamı ilə “Naxçıvan Muxtar Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı”nın təsdiqi bu sahəyə göstərilən dövlət qayğısının bariz nümunələridir.
Daha sonra Zərdab Rayon Heydər Əliyev Mərkəzinin direktoru Könül Rəhimova onlayn tədbir iştirakçılarına Mərkəzin fəaliyyəti haqqında məlumat vermişdir.
Sonda onlayn tədbir iştirakçılarına Naxçıvan Dövlət Xalça Muzeyinin və Zərdab Rayon Heydər Əliyev Mərkəzinin ekspozisiyasından virtual ekskursiyalar keçirilmişdir.